Huzuni yazidi Dar!

Mke wa Rais, Mama Salma Kikwete akiweka saini kwenye kitabu cha Maombolezo ya Msanii nguli wa Filamu nchini, Marehemu Steven Kanumba aliefariki Dunia siku mbili zilizopita nyumbani kwake Sinza Vatican,Jijini Dar es Salaam.

Mbunge wa Urambo Magharibi, Mheshimiwa Juma Kapuya akiweka saini kwenye kitabu cha Maombolezo ya Msanii nguli wa Filamu nchini, Steven Kanumba

Iman Madega naye alikuwapo, hapa akiweka saini kwenye kitabu cha Maombolezo

Mkongwe wa Muziki nchini,King Kikii akiweka saini kwenye kitabu cha Maombolezo ya Marehemu Steven Kanumba aliefariki nyumbani kwake Sinza Vatican,Jijini Dar es Salaam.

Mke wa Rais,Mama Salma Kikwete akikumbatiana na Mama Mzazi wa Marehemu Steven Kanumba wakati alipofika nyumbani hapo kwa ajili ya kuhani msiba huo,jana jioni

Mke wa Rais,Mama Salma Kikwete akimfariji Mama Mzazi wa Marehemu Steven Kanumba,Nyumbani kwa Marehemu,Sinza Vatican jijini Dar jioni ya leo. Kushoto ni Dada wa Marehemu Steven Kanumba.

Baadaye Mama Salma Kikwete alipata muda na kuzungumza na wasanii waliokuwa wakifanya kazi pamoja na marehemu

Ratiba ya mazishi ya Steven Kanumba

Msanii wa filamu, aliyebeba mapenzi makubwa ya Watanzania, Waafrika na dunia kwa jumla, Steven Charles Kanumba aliyefikwa na mauti ghafla Aprili 7, 2012, atazikwa kesho Makaburi ya Kinondoni, Wilaya ya Kinondoni, Dar es Salaam.

Mazishi ya Kanumba, yamepangwa na kuratibiwa kwa kuzingatia heshima, umaarufu, mapenzi yake kwa watu na hadhi ya kimataifa aliyonayo, hivyo imetolewa fursa ya wengi kumuaga msanii huyo ambaye ni mwanamapinduzi wa tasnia ya filamu ukanda wote wa Afrika Mashariki na Kati.

Mpangilio wa ratiba na nafasi itatolewa kwa kila mtu mwenye kuhitaji kushiriki mazishi ya Kanumba, kufanya hivyo katika tukio la kihistoria la kumsindikiza ndugu yetu huyo kwenye maisha ya milele. Hivyo, wito unatolewa kwa kila mtu kujitokeza kwenye shughuli nzima.

Ratiba

Mwili wa marehemu Steven Kanumba utachukuliwa kwa msafara kutoka Hospitali ya Taifa, Muhimbili saa 2:30 asubuhi. Utapitishwa Barabara ya Umoja wa Mataifa na Ali Hassan Mwinyi hadi Viwanja vya Leaders Club, Kinondoni ambako Misa ya kumuombea itasomwa pamoja na salamu mbalimbali kabla ya watu wote kumuaga.

Wito unatolewa kwa watu kujitokeza kwa wingi kuanzia saa 2:00 asubuhi, wakijipanga kando ya Barabara za Umoja wa Mataifa na Ali Hassan Mwinyi ili wautolee heshima mwili wa Kanumba wakati ukitolewa Muhimbili kwenda Leaders Club.

Saa 3:30 asubuhi, mwili wa Kanumba utapokelewa Viwanja vya Leaders, ukitanguliwa na mapokezi ya wazazi wake, viongozi mbalimbali wa serikali ambao juu yao kabisa atakuwa Makamu wa Rais wa Jamhuri ya Muungano wa Tanzania, Dk. Mohamed Gharib Bilal.

Saa 4:00, itakuwa ni muda wa kusoma Misa ambayo itachukua dakika 60, saa 5:00 kitakuwa kipindi cha salamu kutoka kwa watu mbalimbali.

Saa 6:00 mchana, ratiba ya kumuaga Kanumba itaanza mpaka saa 9:00 alasiri na baada ya hapo, utakuwa wakati wa kuusafirisha mwili kwa msafara kutoka Leaders Club mpaka Makaburi ya Kinondoni, msafara ukipita Barabara ya Tunisia, utakatisha Barabara ya Kinondoni kuelekea makaburini.

Saa 10:00 alasiri, mazishi yatafanyika kwa kufuata utaratibu wa imani ya marehemu.

Kamati ya Mazishi inatoa wito kwa watu watakaohudhuria shughuli ya kumzika ndugu yetu Kanumba, kuja na maua ili kumuaga kwa heshima.

Utulivu, unyenyekevu na ustahimilivu ni mambo muhimu yanayohitajika katika kipindi chote cha kumuaga mpendwa wetu Kanumba.

Bwana alitoa, Bwana ametwaa. Sisi wote tulimpenda kwa dhati na tulitamani aendelee kuwa nasi siku zote ila Mungu aliyemleta kwa mapenzi yake ameamua kumchukua. Jina lake lihimidiwe.

K.N.Y GABRIEL MTITU

MWENYEKITI WA KAMATI YA MAZISHI

Hatima ya Lulu iko mikononi mwa DPP

Hatma ya msanii maarufu wa kike Elizabeth Michael maarufu kama ‘Lulu’ anayeshikiliwa polisi kufuatia kifo cha msanii Steven Kanumba iko mikononi mwa Ofisi ya Mkurugenzi wa Mashtaka (DPP).

Kamanda wa Polisi Mkoa wa Kinondoni, Charles Kenyela alisema suala la msanii huyo kusema ana kesi ya kujibu au la, liko mikononi mwa DDP ambaye ndiye atakayepitia jalada baada ya polisi kukamilisha upelelezi wao.

Kamanda Kenyela alisema Lulu kupelekwa mahakamani ni uamuzi wa DPP ambaye atatakiwa kulipitia faili lake na kujiridhisha kama ana kesi ya kujibu au la.

“Kumpeleka mahakamani ni mpaka DPP tutakapomwasilishia jalada la tuliyoyakusanya na ndiye atakayeamua kama kuna kesi ya kujibu au hakuna,”alisema Kamanda Kenyela.

Alisema hadi hivi sasa bado wanasubiri ripoti ya uchunguzi wa daktari ambao hata hivyo hawatautoa kwa vyombo vya habari kwa kuwa huwa ni siri.

“Bado tunasubiria ripoti ya daktari na upelelezi unaendelea ila ripoti hiyo ni siri, si lazima apelekwe mahakamani kesho (leo) kwa kuwa bado upelelezi unaendelea,”alisema Kenyela.

Kanumba alifariki usiku wa kuamkia Jumamosi nyumbani kwake, Sinza Vatican, jijini Dar es Salaam.

Habari zilizopatikana na kuthibitishwa na Kenyela, zilieleza kuwa kifo cha msanii huyo kilitokana na ugomvi uliotokea kati yake na mpenzi wake ndani ya nyumba yake.

Taarifa za kifo cha Kanumba zilianza kusambaa kuanzia saa 10.00 alfajiri na kuenea kwa kasi ambapo hadi kufikia saa moja asubuhi, mamia ya watu walikuwa wamejazana nyumbani kwa Kanumba kutaka kuthibitisha habari hizo.

Kadri muda ulivyozidi kusogea ndivyo idadi ya watu ilizidi kuongezeka nyumbani kwa msanii huyo ambaye amejizolea umaarufu mkubwa kutoka na filamu zake kuuzwa na kuonyeshwa katika vituo mbalimbali vya televisheni, ndani na nje ya nchi.

Miongoni mwa watu waliomiminika kwa haraka nyumbani kwa Kanumba ni wasanii wa fani mbalimbali nchini, wanasiasa na viongozi mbalimbali wa Serikali

Chanzo cha kifo chake

Kwa mujibu wa maelezo ya mdogo wake aitwaye Seth ambaye alikuwapo eneo la tukio, alisema kaka yake alishinda nyumbani na baada ya kula chakula cha jioni, alimwambia wajiandae kutoka.

Hapa mwili wake ukiwekwa vizuri kabla haujaingizwa monchwari ya Muhimbili

Seth alisema kuwa wakati Kanumba akiwa tayari amejiandaa, walisikia mlio wa gari likifunga breki nje ya nyumba.

Alisema gari hilo lilikuwa limemleta mpenzi wa kaka yake msanii wa filamu, Lulu ambaye aliingia ndani na kwenda moja kwa moja chumbani kwa Kanumba.

Baada ya kuingia ndani, muda mfupi alisikia sauti zilizoashiria kuwa kulikuwa na ugomvi kati ya wapenzi hao.

“Ghafla ulizuka mzozo ndani na dakika chache baadaye, Lulu alitoka na kuja kuniambia kuwa Kanumba amedondoka baada ya kujigonga ukutani na kwamba yupo taabani hajitambui,” alisema Seth.

Alisema alipoingia chumbani, alimkuta kaka yake akiwa katika hali mbaya hivyo akaamua kumpigia simu daktari wake, ambaye alipofika na kuwashauri wampeleke haraka Hospitali ya Taifa ya Muhimbili kupatiwa matibabu.

Seth alisema kabla ya kufika Muhimbili walipitia Kituo cha Polisi cha Oysterbay kupatiwa Fomu ya matibabu (PF3).

Hata hivyo, baada ya polisi kupata maelezo ya awali ya ugomvi huo, walimshikilia Lulu kituoni hapo na kumwacha Seth akimpeleka Kanumba hospitali.

Alisema walipofikia Hospitali ya Muhimbili, madakati waligundua kuwa tayari Kanumba alishaaga dunia.

Awali Kamanda Kenyela akithibitisha kutokea kwa tukio hilo alisema Kanumba alikufariki kutokana na ugomvi uliotokea kati yake na rafiki yake wa kike Lulu.

Leo jioni hii

Kuonyesha kuwa marehemu alikuwa mtu wa watu geti la nyumba yake limefungwa wandani wandani wa nje wa nje, wengine iliwalazimu kupanda juu ya ukuta ili kupata jua yanayojiri ndani, kweli mdogo wetu alipendwa na watu!

Kwa kifupi njia imefungwa.....watu wa usalama barabarani wametanda hapa

Mwanzo, mwisho wa Steven Kanumba

“Amka Kanumba, mama amekuja. Amka baba. Unameremeta baba, ndoa yako ya mwisho hii… kwaheri mwanangu,” ni maneno ya Mama Mzazi wa Steven Kanumba, Flora Mtegoa mara baada ya kuwasili nyumbani kwa marehemu Sinza, Dar es Salaam akitokea Bukoba.

Maneno hayo yaliyokuwa yakiambatana na kilio alikuwa akiyatoa huku akichanganya lugha za Kisukuma na Kiswahili alieleza jinsi alivyopata taarifa za msiba, adhuhuri ya Aprili 7.

Mara baada ya kuwasili Sinza, Vatican nyumba ya marehemu Kanumba ilizungukwa na umati wa waombolezaji, waliokuwa ndani walitoka kumpokea na hata wale waliokuwa jirani na eneo hilo walisogea wakitaka kumuona.

Kuwasili kwa mama huyo kuliongeza machungu kwa ndugu, jamaa, wasanii na mashabiki ya msanii huyo nguli kiasi cha baadhi yao kupoteza fahamu.

Kikwete aahirisha safari

Rais Jakaya Kikwete jana aliongoza mamia ya waombolezaji katika msiba wa msanii huyo akisema alilazimika kusitisha safari yake ya nje ya nchi ili kuungana na wananchi wengine katika maombolezo hayo.

“Nimeguswa na msiba huu, nilikuwa nisafiri lakini nimeamua kuja hapa kuwapa pole ndugu na wasanii wote,” alisema Rais.

Rais Kikwete akisalimiana na mdogo wake Kanumba, Sethi alipowasili nyumbani kwa marehemu Sinza ‘Vatican’ leo

Rais Kikwete akiweka saini katika kitabu cha maombolezo nyumbani kwa marehemu Steven Charles Kanumba

Rais Kikwete akiwafariji wafiwa nyumbani kwa marehemu Steven Charles Kanumba Sinza ‘Vatican’ Dar leo April 8, 2012 alikofika kuwapa pole

Rais Kikwete akiwafariji wafiwa

Kanumba (28), ambaye anatarajiwa kuzikwa kesho katika Makaburi ya Kinondoni, Dar es Salaam alifariki dunia katika mazingira ya kutatanisha na hadi sasa Polisi inachunguza tukio hilo huku ikimshikilia msanii wa kike, Elizabeth Michael (Lulu).

Ndugu wa marehemu, Seth Bosco ambaye ana sura inayoshabihiana kwa karibu Kanumba alisema kauli ya mwisho kuisikia kutoka katika kinywa cha kaka yake huyo ilikuwa ni ‘nisubiri.’

Alisema jioni ya Aprili 6, mwaka huu, marehemu alimwambia angependa watoke kwenda matembezini pamoja.

“Ilipofika sita za usiku, nilimwambia kuwa mimi nimekwishajiandaa, akasema ‘nisubiri’ na kisha akaingia chumbani mwake,” alisema Seth na kuongeza:

“Kanumba akiwa chumbani kwake, aliingia binti mmoja, ambaye ninamfahamu kuwa ni mtu wake wa karibu. Kwa kuwa namfahamu, sikushangazwa na ujio wake, aliingia chumbani kwa Kanumba.”

Seth alisema baada ya muda, alisikia sauti zilizoonyesha mgogoro wa aina fulani kutoka chumbani humo na alipotaka kuingia, mlango ulikuwa umefungwa kwa funguo.

“Nilisikia Kanumba akimwambia Lulu; ‘Yaani unapigiwa simu na mwanamume wako mbele yangu?’ Baada ya dakika kadhaa za mzozo chumbani, Lulu alitoka akisema kuwa Kanumba ameanguka,” alisema Seth.

Lulu

Alisema ripoti ya awali ya daktari inaonyesha kuwa marehemu hana jeraha lolote katika mwili wake… “Kama alisukumwa ukutani, basi lazima jeraha lingeonekana katika ubongo, lakini ripoti inaonyesha hana jeraha na mimi nilimkuta marehemu akiwa anatokwa na povu mdomoni, macho yamemtoka, huku akikoroma, cha ajabu hakutokwa damu… bado tunasubiri uchunguzi zaidi wa polisi.”

Akizungumzia msiba huo dada wa marehemu, Kabela Kajumulo alisema: “Ninachoweza kusema ni kuwa, tumepata pengo lisiloweza kuzibika.”

Wasanii wamwelezea

Wasanii wa filamu na muziki waliokuwa katika msiba huo walimwelezea marehemu Kanumba kwamba alikuwa ni mtu wa watu.

Akimzungumzia marehemu Kanumba, mmoja wa wasanii hao, Blandina Chagula (Johari), alisema alikuwa zaidi ya rafiki kwake akisema hawakujuana katika maigizo tu, bali walicheza pamoja tangu utotoni.

“Nimesoma na Kanumba Mwanza, Shule ya Msingi Bugoyi, lakini si hivyo tu, bali mama yake Kanumba na mama yangu ni marafiki wa karibu. Tulikutana tena hapa jijini, lakini yeye akisoma Shule ya Jitegemee mimi, shule nyingine, ndipo tulipojiunga katika maigizo katika Kikundi cha Kaole.”

Johari alisema amepata pigo kwa kuondokewa na Kanumba kwani alikuwa ni zaidi ya kaka na zaidi ya rafiki akisema alikuwa mshauri na alimuonya pale alipokosea.

Alitaja mambo matatu ambayo angependa wasanii wengine wamuige Kanumba. Aliyataja kuwa ni uchapakazi, kujihifadhi na ustaarabu…“Hana mfano wake, alikuwa ni mstaarabu, mwenye upendo na anayejiheshimu,” alisema Chagula.

Ruth Suka (Mainda) ambaye aliwahi kufanya kazi na marehemu Kanumba pia alimwelezea kuwa alikuwa miongoni mwa watu wachapakazi na wanaojiheshimu.

Alisema Kanumba alikuwa kijana mstaarabu na kabla hajawa maarufu, alikuwa akiogopa mno kuwa karibu na wanawake… “Ni mtu aliyejisitiri mno na mambo yake, lakini mazingira yake ya usanii yalimfanya aanze kuchangamka na kujichanganya na watu wa rika zote. Kwa kifupi ni mtu wa kanisa.”

Msanii mwingine ambaye pia alisoma na marehemu Jitegemee, Emmanuel Myamba alisema alikuwa na uhusiano wa karibu na kwamba alifahamu mambo mengi na kujifunza mwengi kupitia kwa marehemu.

Ujumbe wa mwisho

Aprili, 6 mwaka huu Kanumba alitoa ujumbe ulioonekana kutabiri kifo chake, akiyanukuu maneno ya Mwanafalsafa, Albert Pine na ujumbe huu aliuandika baada ya kutoka kwenye uzinduzi wa jengo la THM lililopo Msasani jijini Dar es Salaam na hapo juu ni picha alizopiga akiwa pamoja na Khadija Mwanamboka katika uzinduzi huo yaliyosema:

"What we do for ourselves dies with us. What we do for others and the world remains and is immortal."

“Tunachofanya kwa ajili yetu tunakufa nacho. Lakini tunachofanya kwa wengine na kwa ulimwengu, kinadumu na ni cha milele.”

Maafa Honduras!!

Wafanyakazi wa wizara ya afya na askari wa magereza nchini Honduras wakisaidiana kuhifadhi miili ya wafungwa walioteketea kwa moto.

Hii ni hatari

Watoto wakazi wa Kivule Bombambili, Manispaa ya Ilala nje kidogo ya jiji la Dar es Salaam wakivuka mto kwa kupita juu ya gogo la mnazi. Mvua zilizonyesha mwishoni wa mwaka jana zilisababisha mafuriko yaliyosomba karavati katika eneo na kusababisha kwa sasa wananchi kwa shida na ni hatari.

Ukuta aliojengwa kuzuia maji ya Bahari ya Hindi yasiharibu kingo za eneo la Ocean Road jijini Dar es Salaam, umebomoka kutokana na mawimbi ya bahari hiyo kuongeza kasi inayochangiwa na mabadiliko ya tabia nchi duniani. Hali hiyo inatishia mazingira ya eneo hilo.

Kazi ni kazi, usidharau ya mwenzako

Mchuuzi wa dagaa, Mohammed Maulid, akianika bidhaa hiyo baada ya kuvuliwa Bahari ya Hindi, Dar es Salaam jana, ikiwa ni maandalizi ya kuwakaanga tayari kuwapeleka kwa wateja Kata ya Msanga, wilayani Kisarawe, mkoani Pwani.

Fundi wa Shirika la Umeme Tanzania (Tanesco), akipanda kwenye nguzo ya umeme tayari kwa kufunga nyaya ili kusambaza umeme kwenye eneo la Mabwepande, nje kidogo ya Jiji la Dar es Salaam walikohamishiwa waathirika wa mafuriko yaliyotokea mwishoni mwa Desemba mwaka jana.

Harakati zinaendelea Mashariki ya Kati

Wananchi wa Palestina wakiwa na mabango yao huku wakiandamana baada ya kusikia katibu mkuu wa Un ameshafika nchini humo huku wakiwa wameshikilia mabango yaliyoandikwa “Ban Ki Moon upendeleo basi kwa Israel”.

Dk Mwakyembe ajitokeza hadharani, arusha kombora

Hatimaye, Naibu Waziri wa Ujenzi na Mbunge wa Kyela, Dk Harrison Mwakyembe jana alijitokeza hadharani na kusema amepona huku akiapa kuendeleza vita dhidi ya mafisadi hadi kifo chake.

Dk Mwakyembe aliondoka nchini Desemba 9, mwaka jana kwenda katika Hospitali ya Appolo, India kwa matibabu baada ya kuugua maradhi yaliyosababisha ngozi yake kuharibika na tangu arejee alikuwa hajawahi kuonekana katika hadhara ya watu.

Jana, waziri huyo alionekana mwenye afya njema huku akiwa amevalia suti, glovu nyeusi na kofia aina ya pana.

Akiwa na kundi la makada wenzake wa CCM wanaojipambanua kupambana na ufisadi, akiwemo Waziri wa Ushirikiano wa Afrika Mashariki, Samwel Sitta, Dk Mwekyembe alisema awali, alikuwa na hali mbaya kiafya lakini sasa anamshukuru Mungu kwa kuwa anaendelea vizuri.

Mwakyembe na kundi hilo walikuwa katika uzinduzi wa Programu ya Neno la Hekima kutoka kwa Kiongozi iliyoanzishwa na Kanisa la Ufufuo na Uzima na kuongozwa na Mchungaji Josephat Gwajima, Dk Mwakyembe.

Wengine waliohudhuria ni Mbunge wa Same Mashariki, Anne Kilango Malecela, Mbunge wa Kahama, James Lembeli, Mbunge wa Viti Maalumu Mbeya, Hilda Ngoye, aliyekuwa Mbunge wa Vunjo, Aloyce Kimaro na Mjumbe wa Umoja wa Vijana (UVCCM), Mkoa wa Kilimanjaro , Paul Makonda.

Mbali ya kuapa kuendeleza mapambano dhidi ya mafisadi, Dk Mwakyembe pia alitoboa siri ya afya yake akisema: “Nilifika hospitalini Oktoba 10 (mwaka jana), na tangu wakati huo sikuweza kuvaa viatu lakini leo hii naweza kuvaa viatu, kwa hiyo shetani ameshindwa.”

Alisema atatumia siku za Jumapili kuzunguka katika makanisa mbalimbali kwa lengo kumkemea shetani.

Sitta atoa tuhuma

Kwa upande wake, Sitta ambaye ni mshirika wa karibu kisiasa wa Dk Mwakyembe alirejea kauli yake ya awali kuwa Naibu Waziri huyo alilishwa sumu.

“Nasema Dk Mwakyembe kapewa sumu. Kama vyombo vya uchunguzi vinasema siyo basi watueleze ukweli, tena haraka” alisema Sitta na kushangiliwa na maelfu ya waumini wa kanisa hilo.

“Vipi uone binadamu ambaye ukimshika katika ngozi unga unamwagika chini, mhudumu anakuja kuufagia lakini baada ya saa moja unarudi tena, kitu hicho siyo cha kawaida. Wamejaribu, wameshindwa kwa kuwa Dk Mwakyembe analindwa kwa jina la Yesu ambalo ni kubwa kuliko yote. Kwa hiyo nuksi, kurogwa kuwekewa sumu ni kama maji katika mgongo wa bata, yanatiririka tu na kwenda zake,” alisema Sitta.

Alisema mafisadi wapo kwa ajili ya kuangamiza taifa na kuwaangamiza viongozi wanaotetea maslahi ya wananchi na kutokana na hali hiyo, siku zao zina hesabika.

“Mungu yupo kwa ajili ya kutetea wanyonge na si kuwalinda mafisadi hao... ndiyo maana Dk Mwakyembe amepona. Kwa sababu alikuwa miongoni mwa watu wanaotetea maslahi ya wananchi,” alisema.

Tumejipanga

Kwa upande wake, Kilango alisema kundi lao la wapiganaji na wapambanaji wa ufisadi lipo makini kutetea maslahi ya taifa na si watu wachache akisema wamejitoa muhanga kwa ajili ya kuwashughulikia.

“Kundi letu limeundwa kwa ajili ya kutetea maslahi ya Watanzania, ndiyo maana tulikuwa na nguvu kwenye Bunge la Tisa la kasi na viwango ambalo lilikuwa linafanya uamuzi wa haki bila ya kumuonea mtu, kutokana na hali hiyo tumejipanga upya, tutawashughulikia,” alisema.

Alisema Bunge hilo lililoongozwa na Sitta lilikuwa makini kwenye uamuzi na kwamba hawataogopa kulishwa sumu wala kutishiwa maisha akisema wako tayari kwa lolote kwa ajili ya kutetea maslahi ya wananchi na wana imani kwamba watashinda.

Naye Lembeli alisema Mungu amemponya Dk Mwakyembe na sasa yuko tayari kufa kwa ajili ya kutetea maslahi ya wananchi huku Ngoye akisema amezaliwa ili kutetea maslahi ya wananchi na kupambana na walafi, wala rushwa na mafisadi wanaodhulumu haki za wananchi.

“Tumerudi kwa kishindo, kwa ajili ya kutetea haki zenu, tunaomba mzidi kutuombea ili tuweze kuwashughulikia, hatuwezi kuona wananchi wananyonywa na wachache wakati wenyewe wananeemeka,” alisema Ngowe.

Kwa upande wake, Kimaro alidai kwamba mafisadi walitumia zaidi ya Sh120 milioni kwa ajili ya kumng’oa jimboni kwa sababu alionekana ni miongoni mwa watu wanaojifanya wana kimbelembele katika kutetea maslahi ya taifa.

Alisema licha ya kutoka bungeni, msimamo wake utabaki palepale, kutetea maslahi ya wa wananchi na Watanzania kwa ujumla... “Haiwezekani rasilimali za Watanzania ziliwe na wachache. Tutapambana iwe kwa jua au mvua,” alisema Kimaro.

Madaktari waendeleza libeneke

Waziri wa Afya na Ustawi wa Jamii Dk. Haji Mponda, Waziri wa Mambo ya Ndani Shamsi Vuai Nahodha na Mkuu wa Mkoa wa Dar es Salaam wakiwa busy na simu zao Muhimbili jana, wakiwa katika harakati za kunusuru mgogoro ili madaktari warejee kazini.

Waziri wa Afya na Ustawi wa Jamii Dk. Haji Mponda, Naibu wake Dk. Lucy Nkya (kushoto) na Waziri wa Nchi, Ofisi ya Rais, Menejimenti ya Utumishi wa Umma, Hawa Ghasia (kulia) wakijadili jambo kabla ya kutambulisha katika mkutano wa madaktari katika hoteli ya Starlight kabla ya kutimuliwa kikaoni hapo.

Women In Balance-kitchen party Gala

Mratibu wa wa Wanawake Mezani (Women In Balance-kitchen party Gala), Dina Marios akizungumza na waandishi wa habari jijini Dar es Salaam jana , kuhusu msimu wa pili wa mkusanyiko wa wanawake waliolenga kutoa mafunzo kwa wanawake wenzao katika Nyanja mbalimbali za kijamii utakaofanyika Jumamosi Mikocheni jijini Dare s Salaam. Kulia ni Mratibu, Vida Mdolwa.

Kwaheri mdogo wetu Beatus Kagashe

Viongozi wa MCL, ndugu na jamaa wakiliingiza jeneza lenye mwili wa marehemu Beatus kanisani tayari kwa maombi na sala ya kumwaga

Marehemu Beatus Kagashe

Kumwelezea marehemu
Mama wa marehemu akimwelezea mwanaye

Mhariri Mtendaji wa mwananchi Communication

Mke wa marehemu (kulia)

Ni kweli huu ndio mpira wa Bongo??!!

Niliuona huu mchoro uliyochorwa na kaka yangu Sammy kwenye gazeti la Citizen, ulinifurahisha sana. lakini ndio hali halisi, Tanzania hatuna timu, kazi yetu kuchezesha mpira kwa midomo yetu na magazetini.

Tanzania yawakilisha dai la nyongeza eneo la bahari

Jahhuri ya Muungano wa Tanzania, imewasilisha katika Umoja wa Mataifa, Andiko la kudai eneo la nyongeza lenye ukubwa wa maili 16,000 nje ya eneo la sasa la maili 200 za Ukanda wa Kiuchumi wa Bahari.

Waziri wa Ardhi na Maendeleo ya Makazi, Mhe. Anna Tibaijuka (Mb) ndiye aliyewasilisha Andiko hilo, kwa niaba ya serikali, katika hafla fupi na ya kihistoria iliyofanyika siku ya Jumatano katika Ofisi za Idara ya Umoja wa Mataifa inayoshughulikia masuala ya Bahari na Sheria ya Bahari.

Andiko hilo lilipokelewa na Mkurugenzi wa Idara hiyo, Sergei Tarassenko kwa niaba ya Katibu Mkuu wa Umoja wa Mataifa ambaye aliipongeza Tanzania kwa hatua hiyo muhimu na kuahidi kwamba Idara yake kupitia, Kamisheni ya Umoja wa Mataifa inayohusika na mipaka ya bahari italifanyia kazi andiko hili.

Mkurugenzi huyo alielezea Tanzania, kama moja kati ya nchi inayoheshimu na yenye historia nzuri katika Umoja wa Mataifa.

Akizungumza wakati wa kuwasilisha Andiko hilo, Waziri Anna Tibaijuka, alisema kwa kuwasilisha Andiko hilo, Tanzania si tu kwamba imefanya kazi ya uhakika ya maandalizi na hatimaye uwasilishaji lakini ni hatua kubwa kwa maendeleo ya kiuchumi na kijamii kwa Tanzania.

Waziri wa Ardhi na Maendeleo ya Makazi , Anna Tibaijuka akimkabidhi Mkurugenzi wa Idara ya Umoja wa Mataifa ya Masuala ya Bahari na Sheria ya Bahari, Sergei Tarassenko kwa Niaba ya Katibu Mkuu wa Umoja wa Mataifa, andiko la kudai nyongeza ya maili 61,000 nje ya eneo la maili 200 la Ukanda wa Kiuchumi wa Bahari , jijini New York, Marekani.

Akabanisha kwamba mchakato wa maandalizi ya Andiko hilo ambao umechukua miaka mitano, umewashirikisha wataalamu mbalimbali wakiwamo wa ndani na nje , ikiwa ni pamoja na kuzihusisha nchi ambazo zinapakana kibahari na Tanzania.

Akizungumza manufaa ya kudai nyongeza ya eneo hilo, Waziri Tibaijuka alisema. “ Tanzania itanufaika kwa kuongeza ukubwa wa eneo la mipaka ya nchi lakini la msingi zaidi ni unufaikaji wa rasilimali zikiwamo za mafuta na gesi na madini ambazo zitakuwamo katika eneo hilo jipya, rasilimali ambazo kwa sasa zinaelekea kutoweka katika eneo la maili 200”.

Eneo ambalo Tanzania inadai liongezwe la maili 61, 000 ukubwa wake ni sawa na eneo la mikoa mitatu ikiunganishwa kwa pamoja.

Aidha kuongezwa kwa eneo hilo kutaisaidia pia serikali katika masuala ya ulinzi na usalama hasa katika kipindi hiki ambacho vitendo vya kiharamia wa baharini vikiwa vimeongeza katika eneo la bahari ya Hindi.

Mbunge Chadema afariki

Mbunge wa Viti Maalumu kwa tiketi ya Chama cha Demokrasia na Maendeleo (Chadema), Regia Estelatus Mtema (32), amefariki dunia baada ya gari alilokuwa akiendesha, kupinduka eneo la Mlandizi, Kibaha mkoani Pwani jana.

Ajali hiyo ilitokea saa 5:30 asubuhi karibu na Sekondari ya Ruvu, wakati mbunge huyo na watu wengine saba, wakisafiri kwa gari aina ya Toyota Landcruiser wakitoka Dar es Salaam kwenda Morogoro.

Akielezea mazingira ya ajali hiyo, Kamanda wa Polisi Mkoa wa Pwani, Ernest Mangu, alisema mbunge huyo alifariki baada ya gari hilo alilokuwa akiendesha mwenyewe, kuacha njia na kupinduka.

Alisema ajali hiyo ilitokea baada ya Mtema kujaribu kulipita gari lililokuwa mbele yake na ghafla aliona gari lingine likija kasi mbele yake, katika kujaribu kulikwepa, ndipo gari hilo lilipinduka.

"Wakati akiwa hajalipita gari hilo aliliona gari lingine likija mbele kwa kasi , katika kulikwepa wasigongane uso kwa uso, alitoa gari lake barabarani na kusababisha kupinduka,’’ alisema Mangu.

Alisema watu wengine saba waliokuwa kwenye gari hilo walijeruhiwa, wawili kati yao hali zao zilikuwa mbaya, walipelekwa Hospitali ya Taifa ya Muhimbili (MNH) Dar es Salaam kwa matibabu zaidi, huku wengine watano, wakiwahishwa Hospitali Teule ya Tumbi Kibaha.

Aliwataja majeruhi waliolazwa Tumbi kuwa ni Lawrence Mtokambali (58), Benadetha Mtema (50), Peter Madesa (50) na Rogers Abdallah(18).

Chadema yatoa tamko

Chadema kilisema kuwa Mtema alikuwa Mjumbe wa Kamati Kuu ya Chama hicho na Waziri Kivuli wa Kazi na alikuwa mchapa kazi hodari katika majukumu mbalimbali yakiwepo ya kijamii na kisiasa.

Taarifa hiyo iliyotolewa na Chadema jana na kusainiwa na Katibu Mwenezi wa chama hicho, John Mnyika ilieleza kuwa viongozi wakuu wa chama hicho wakiongozwa na Mwenyekiti wao Freeman Mbowe, Katibu Mkuu, Dk Willibroad Slaa, wajumbe wa Kamati Kuu, Wakurugenzi wa chama hicho makao makuu na wabunge, wameshtushwa na kifo hicho na kuungana na familia ya marehemu katika kipindi hiki kigumu cha majonzi.

Chadema kimesema taarifa zaidi kuhusu taratibu za maziko, itatolewa mara baada ya kukamilisha majadiliano kati familia ya marehemu, chama na Ofisi ya Bunge la Jamhuri ya Muungano wa Tanzania.

Kufuatia kifo hicho, mkutano wa Chadema uliokuwa umepangwa kufanyika jana Mjini Kibaha umehirishwa hadi itakapotangazwa wakati mwingine.

Elimu yake

Mtema alizaliwa Aprili 21, 1980. Alisoma elimu ya msingi kati ya mwaka 1989 na 1995. Alijiunga na Shule ya Sekondari Forodhani, Dar es Salaam mwaka 1996 hadi 1999 na kuhitimu kidato cha nne.

Aliendelea kidato cha tano 2002 na sita kati ya mwaka 2000 na 2002 katika Shule ya Sekondari ya Wasichana ya Machame, mkoani Kilimanjaro.

Mwaka 2003 hadi 2006 alisoma Chuo Kikuu cha Kilimo cha Sokoine (SUA) na kupata Shahada ya Maarifa ya nyumbani na Lishe.

Baada ya kuhitimu shahada yake, marehemu Mtema alifanya kazi katika taasisi mbalimbali kabla ya kujiunga na Chadema na kuteuliwa kuwa Ofisa Mwandamizi katika Kurugenzi ya Vijana ya chama hicho.

Baadaye aliteuliwa kuwa Ofisa Mwandamizi katika Kurugenzi ya Mafunzo ya chama hicho, nafasi ambayo aliishikilia hadi mwaka 2010 alipoteuliwa kuwa Mbunge wa Viti Maalum.

JK amtumia rambirambi Mbowe

Wakati huo huo, Rais Jakaya Kikwete amemtumia salamu za rambirambi Mwenyekiti wa Chadema, Freeman Mbowe kufuatia kifo cha mbunge huyo.

Katika salamu hizo, Rais ameelezea kusikitishwa kwake na taarifa za kifo cha mbunge huyo na kueleza kwamba, marehemu Mtema amepoteza maisha akiwa kijana na kwamba pigo hilo si kwa Chadema pekee bali kwa taifa zima.

“Nimepokea kwa masikitiko na huzuni nyingi habari za kifo cha Mheshimiwa Mtema katika ajali ya gari. Siyo kwamba ajali hii imechukua maisha ya kijana bali imelinyang’anya taifa mbunge hodari, na kwa hakika, kifo chake siyo tu ni pigo kwa chama chako bali ni pigo kwa sote na kwa taifa letu kwa jumla.

"Nakutumia wewe binafsi, chama chako na wanachama wake salamu za dhati ya moyo wangu kuomboleza kifo na msiba huu mkubwa," alisema Rais Kikwete kupitia taarifa iliyotolewa na Kurugenzi ya Mawasiliano Ikulu.

Aliongeza: “Napenda ujue kuwa niko nanyi katika msiba huu. Napenda vilevile uniwasilishie salamu zangu za rambirambi za dhati kabisa kwa wana-familia, ndugu na jamaa wa marehemu Mheshimiwa Mtema.

Taarifa hiyo imemwomba Mbowe kufikisha salamu za Rais Kikwete kwa familia ya mbunge huyo na kuijulisha kuwa amepokea habari hizo kwa huzuni kubwa.

"Wajulishe kuwa nawaombea kwa Mwenyezi Mungu, Mwingi wa Rehema, awajalie uvumilivu na subira katika kipindi hiki kigumu kwa sababu yote ni mapenzi yake.